ССП-дағы радиациялық мониторинг

2025 жылғы наурызда Қазақстан Республикасының Ұлттық ядролық орталығы (ҚР ҰЯО) бұрынғы Семей сынақ полигоны (ССП) аумағында дала жұмыстарына кірісті. Радиациялық қауіпсіздік және экология институтының (РҚЭИ) мамандары қоршаған орта сынамаларын алу үшін Семей ядролық қауіпсіздік аймағы (СЯҚА) шекарасындағы мониторинг бекеттеріне баруды ұйымдастырды. Жұмыс орнында ауа аэрозольдерінің сынамасы алынды, бақылау ұңғымалары тазартылып, жерасты суының сынамалары алынды. Сынамалар зертханалық талдауға жіберілді.
СЯҚА аумағында радиациялық мониторинг 2022 жылдан бастап тұрақты түрде жүргізіледі. Мониторингтің мақсаты – радиациялық қауіпті аумақтардың шекарасындағы радиациялық жағдайды бағалау үшін гамма-сәулеленудің баламалы дозасының қуаттылық деңгейін бақылау, жерүсті және жерасты суларындағы, ауадағы, топырақтағы және өсімдіктердегі техногендік радионуклидтердің мөлшерін бақылау.